Financiamento As autonomías dan por vez primeira máis diñeiro que o Estado para a dependencia
Os expertos auguran que este desequilibrio, que fai que se incumpra a lei, incrementarase no futuro
- Autor:
- Mario Beramendi
- Localidade:
- santiago/a voz.
- Data de publicación:
- 19/12/2010
O modelo de financiamento paritario da lei de dependencia, que reparte o custo da súa aplicación a partes iguais entre o Estado e as comunidades, rompeuse por vez primeira este ano. As autonomías xa achegan máis que o Goberno central, o que supón un incumprimento do marco legal vixente, e condena ás facendas rexionais nun contexto de crise. Os datos fíxoos públicos onte o Observatorio Estatal para a Dependencia, que celebrou estes días en Santiago a súa sexta reunión. No que vai do 2010, o Estado achegou 1.777 millóns de euros, o 32%, mentres que as comunidades, no seu conxunto, desembolsaron 3.006,2 millóns, o que representa o 54%. O 14% restante correspóndese co copago dos usuarios. As previsións que manexa o Observatorio nun informe que fará público nos próximos días revelan que, lonxe de corrixirse, este desequilibrio irá aumentando a partir do 2011. Un horizonte que empeza a xerar inquietude nas comunidades, que ven perigar a medio e longo prazo a sustentabilidade dun modelo, cada vez máis custoso polo envellecemento poboacional. A desproporción entre o que paga o Estado e as comunidades obedece, en gran parte, ao modelo de financiamento deseñado polo Goberno, no que a Administración central achega en función do grao de discapacidade do dependente e non do custo do servizo que se lle dá. «Non é o mesmo unha libranza de coidador de 500 euros que financiar unha praza de residencia, que custa moito máis diñeiro», explica José María Ramírez, presidente do organismo. Esta é unha das reivindicacións que abanderou nos últimos meses Beatriz Mato, conselleira de Traballo e Benestar, quen atribúe á falta de financiamento de Madrid a espera que ten Galicia. «Se fixesen o mesmo esforzo que nós, os datos serían outros», asegura.
No hay comentarios:
Publicar un comentario